De lüde achter de skryvwyse
Wy sint en gruppe neddersassiskspråkige lüde twüsken 15 un 38 uut Grönningen, Neddersassen, Oustwestfålen, Sleeswyk-Holsteyn, dat Suderland, Twente un de Veluwe. Wy hebbet uns binnennets kennen leyrd un wulden dår gemeynskaplike projekten, eks. to dat öäversetten van äpps un websteaden nå uns språke uptrekken.
Dårby markeden wy, wat doch uns barg an regionaal afwyken skryvwysen vöär en hindernis is vöär öäverregionaal un grensöäverstryden tosamenarbeid. Dårvöär begunnen wy anvang 2017 en gemeynskaplike skryvwyse uut to warken, dee souveale neddersassiske dialekten as möäglik afdekken skal. De uutkumst köänet jy up disse websteade seen.
De Nysassiske Skryvwyse skal en brügge weasen twüsken alle vorsküllen regionalen skryvwysen in uns språkgebeed un soudännig skrivtlike öäverregionale un grensöäverstryden kommunikatioon in uns språke vorlichteren.
Dit skal wysen, dat de neddersassiske språke ni man vöär olde vortellings in den eygen dörpskontekst dögt, man dat see lüde öäver en wyde regioon vorbinden deit un en leavendigen deyl van den modernen aldag is. Sünderlik wy junge lüde sint minder bunden an den eygen heimaadplakken un kommuniceret binnennets vaken med lüde van anderweagens – ouk med neddersassiskspreaken lüde uut ander landen.
Upto wüllet wy gaern språkuutbouw vöärandryven, dit heyt, den woordvöärråd uutbouwen vöär nye domainen, dat eyn neddersassisk in alle leavenssituationen as en normale språke bruken kan un ni de heyle tyd düütske or nedderlandske leynwöörde twüskenskuven mut, dee de grensöäverstryden vorståbårheid vorswåret. Blangen de skryvwyse sülven maket wy ouk poosts öäver de neddersassiske språke almeyn un ander mindertalspråken.
